Festejëde cun nëus: L jubileum dla Grupa Balarins Urtijëi y di Pëufla
2023 – tosc iela tan inant: cun truepa legrëza, mujiga de bona ueia y bal festejons nosc jubileum.
La Grupa Balarins de Urtijëi ie unida metuda su da Toni Senoner Demetz, ënghe cunesciù sciche Toni Polizai, dan bele 60 ani, plu avisa tl 1963. Ntlëuta ova la lia mo inuem Grupa Bal y Usanzes Populeres Gherdëina. Chësta fova metuda adum da balarines y balarins y da musicontres y musicontri scialdi mutivei. Ann per ann ie l numer de cumëmbri chersciù y fina śën possa la Grupa Balarins Urtijëi mustré su bën 450 cumëmbri.
La festa ie unida metuda a jì dal cunsëi dla Grupa Balarins Urtijëi sota la urganisazion de Eleonora Schenk, Moritz Prinoth, Romy Lambacher, Maria Insam, Heidi Perathoner, Mateo Senoner y Miran Holzknecht. Sëurapro à duc i cumëmbri dla lia, ndut 43, dat si cuntribut per fé garaté al miec chësta festa y duta la ativiteies dla lia ntan l ann, sciche pra defiledes y prejentazions di bai.
Georg Malfertheiner, Gregor Pasolli, Günther Demetz, Georg Perathoner y Matthias Höglinger ie cunesciui per la band “Pëufla”. Nce chësta grupa de Urtijei possa chëst ann festejé si 30ejimo aniverser davia che la ie unida metuda su tl 1993 per se ancunté y suné deberieda. I Pëufla à bele prejëntà truep albums y cianties rock y pop, sibes ladines ma nce covers, che fej balé y festejé la jënt de uni età.
Ajache tramdoi grupes possa cialé de reviers sun tan de ani de atività, veniel fat na festa de jubileum. Chësta festa tan particulera unirà fata n sada ai 25 de nuvëmber 2023 dala 14:00 inant tla cësa de cultura de Urtijëi. L sunerà i musiconc dla grupa de bal, la grupa odleSound, i sunsëida y sambën nce i Pëufla. Duc i cumëmbri da ntlëuta, ma nce duta la jënt dl post, ie nvieda a balé, cianté, suné y s’la ciaculé cun nëus, cialan de reviers sun i 60 y 30 ani passei.
Da maië y da bever ne manceral nia y sambën ëis nce la puscibltà de vëncer de beliscimi pesć pra nosta lotteria.
Sëis DUC de cuer nviei ala festa, se ncunferton sun vo!
© Grupa Balarins Urtijëi